मनकामना मन्दिरमा परेवा उडाउन नपाइने

मनकामना क्षेत्र विकास समितिले मनकामना मन्दिरमा परेवा नउडानका लागि कडाई गरेको छ ।

लामो समयदेखि भक्तजनले उडाएको परेवाका कारण मन्दिर वरपरको क्षेत्र दुर्गन्धित र फोहोर भएको भन्दै समितिले परेवा नउडाउनका लागि ६५ सालमा गरेको निर्णयमा कडाई गरेको हो । हिजोआज परेवा लिएर आउने भक्तजनलाई चितवनको कुरिनटारस्तीत केवलकार स्टेशनमै रोकिदिने गरेको समितिकी कार्यकारी अधिकृत खिलमाया थापाले बताइन् । 'धेरैले परेवा उडाउन नपाइने निर्णय थाहा नभएको भन्दै लिएर आउने गरेका थिए । जसले गर्दा केहीले उडाउने गरेका थिए' उनले भनिन्, 'तर, परेवा राख्ने खोर नभएको र त्यसको फोहोरले मन्दिर वरपरको क्षेत्र निकै दुर्गन्धित हुने गरेकाले यो महिनावाट लागु हुने गरी परेवा कुनै हालतमा उडाउन नदिने गरी सबैतिर कडाई गरेका छौं ।'

थापाका अनुसार चितवन, गोरखाका प्रमुख जिल्ला अधिरकारी, मनकामना क्षेत्र विकास समिति, पुजारी, गाविस लगायत सरोकारवाला निकायले अर्को व्यवस्था नभएसम्मका लागि तीन बर्ष अघिबाट मन्दिरमा परेवा उडाउन नपाइने निर्णय गरेको थियो । कतिपय भक्तजनहरुले भने उक्त निर्णय थाहा नपाई परेवा ल्याई उडाउँदै आएका थिए । साथै मन्दिर वरपरको क्षेत्रमा परेवाको व्यापार समेत गर्न नपाइने नियम समितिले लागु गरेको थापाले बताईन । उनका अनुसार धेरैले लुकिछिपि परेवाको व्यापार गर्ने गरेको पाइएकाले अबका दिनमा भेटिएमा कारबाही गर्ने निर्णय समेत समितिले गरेको छ ।

'परेवाकै फोहोरले हैंजा आउने खालको वाताबरण सृजना भएपछि पुर्ण रुपमा कडाई गरेका हौं,' उनले भनिन्, 'धेरैले उडाउन नपाइने नियम थाहा नभएको गुनासो गर्न थालेपछि केहि दिनमा सार्वजनिक रुपमै देशभरी सूचना जारी गर्ने तयारी गरेका छौं ।'